Pentsamendu tailerraren jaiotza azaltzea gauza erraza da: Donostiako
filosofia fakultatean "Ikasleen mintegi" bezala jaio zena Oriora ekarri
da. Gauza orokorra, inolaz ere orokorregia.
Ikasleen
mintegian egiten zen moduan, betiko adituei ahotsa eman beharrean jende
gazteari eman nahi zaio ahotsa gehienbat, nahiz eta edonork parte hartu
dezakeen. Gai baten sakonketarako ez da beharrezkoa hizlariak ikerketa
sendoak, unibertsitate ikasketak, esperientzia luzea... delakoa izatea.
Aitzitik. Azaleko jakinduria bat nahikoa izan daiteke gai baten inguruko
pentsamendua lantzeko.
Eta hori da helburu nagusia.
Ziur gaude Orion eta inguruan jakin-mina ez dela falta, ekarpenak egin
nahi dituen gazte asko dagoela, agian lasai hitz egiteko eta bere ideiak
plazaratzeko gunea aurkitzen ez duena. Eremu hori bete nahi du
pentsamendu lantegi honek.
Helburu nagusia, beraz,
tailerrak kontzeptu batzuetara sarrera gisa balio dezan da, oinarrizko
baliabide batzuk eskaini ditzan. Adibidez, Etxeluze gaztetxean umoreari
buruzko solasaldia egin genuenean, lanketa oinarrizkoa umorea
pentsatzeko balio dakizkiguten kontzeptuak ezagutzera ematea izan zen.
Duela gutxi egon ginen Sergio Villarrekin emozioen inguruan hizketan,
eta dinamika berdina garatu genuen, nahiz eta biek soilik hitz egin.
Sergio, gaia ezagutzen duena, hizlari nagusia izan zen, gaiaren inguruko
ahalmendua. Tailerraren ekarpena kontzeptu berri hoiek lantzeko
dinamika bat sortzea da: solasaldia.
Haatik, garbi esan
behar da pentsamendu tailerrak ez dituela bertara eramaten diren auziak
konpontzen. Halako helburu bat arrotza zaigu, ez dugu aintzat
hartzen... Esan dezakeguna tailerrak irauten duen ordu eta erdian
kontzeptu berriak ezagutu daitezkeela, eta haien inguruko iritzi
ezberdinak balioztatu. Solasaldiaren dinamikan, beraz, bakoitzak bere
iritziak hitz berriz esaten ikas dezake, eta iritzi propioak distantzia
batetik ebaluatzen.
Ez dago, beraz, egia absoluturik:
pentsamendua garatzen luzera lagundu dezaketen baliabideak baizik. Hori
eskaini nahi du pentsamendu tailerrak!
iruzkinik ez:
Argitaratu iruzkina